Þríburar - Fyrstu lömbin fæddust í morgun undan ærinni Rut. Fyrst kom eitt, svo kom annað og að lokum það þriðja. Þau hafa hlotið nafngiftina Rip, Rap og Rup.

Sigga og Skjóni að hita upp - Nemendur á reiðkennaradeildinni tóku þátt í móti UMSS á Sauðárkróki um síðustu helgi og Sigga og Skjóni hlutu meistaraflokkseinkunn eða 6,2 en betur má ef duga skal, nú er stutt í lokapróf.

9.05.2007

Nú er tími frjóseminnar, grasið grænkar og fyrstu ungviðin eru komin í heiminn á Sólvangi. Þetta byrjaði að sjálfsögðu með stæl og hraustir þrílembingar komu í heiminn í morgun, 2 gimbur og einn hrútur. Í gærmorgun fæddist svo fyrsta folaldið. Birkið ilmaði, allt var hljótt, yfir oss hvelfdist stjörnunótt, segir í Þórsmerkurljóði. Já er ekki tilveran dásamleg...

Það styttist óðum í lokaprófin mín hérna á Hólum og nú þýðir ekkert annað en að láta hendur standa fram úr ermum og gera sitt allra besta. Annars gengur bara ágætlega með hestana og ég reyni bara að vera bjartsýn með framhaldið. Spennandi að sjá hvernig fer....

Bestu kveðjur að norðan,

Sigga Pje.

Stjarna fædd - Fyrsta folaldið fæddist á Sólvangi í gærmorgun og er það hryssa undan Glampa frá Vatnsleysu og Perlu frá Hvolsvelli. Hún hefur hlotið nafnið Stjörnunótt frá Sólvangi.

Gamli góður - Höfðingi bætir sig með hverjum deginum sem líður og spennandi að sjá hvernig mun ganga í lokaprófunum á Hólum.

Gleðilegt sumar !

Pjetur er að mestu búinn að sjá um að gefa útiganginum í vetur. Hestarnir eru voða miklir vinir hans.

Ef þú smælar framam í heiminn þá mun heimurinn smæla framan í þig ;)

25.04.2007

Vorið góða, grænt og hlýtt,
græðir fjör um dalinn,
allt er nú sem orðið nýtt,
ærnar, kýr og smalinn.

Kveður í runni, kvakar í mó
kvikur þrastasöngur;
eins mig fýsir alltaf þó:
aftur að fara’ í göngur.

Þetta ágæta kvæði, ort af Jónasi Hallgrímssyni, var það fyrsta sem mér flaug í hug þegar ég settist niður við tölvuna hérna í vorblíðunni á Hólum í Hjaltadal. Já vorið er svo sannarlega gengið í garð (allavega hérna fyrir norðan, veit ekki hversu gott það er orðið á suðurlandinu) og fuglarnir syngja okkur inn í sumarið. Senn líður að sauðburði og ég tala nú ekki um öll folöldin sem fara að fæðast. Já maður verður bara háfleygur í sumarblíðunni hehehhehe ;)

Annars er það að frétta að nú fer að styttast í lokaprófin mín hérna á Hólum og því líður ekki á löngu að þangað til ég kem heim á Sólvang aftur. Grétar ætlar þó að drífa sig suður um helgina og prófa nýja mótórfákinn sinn og byrja aftur í gömlu vinnunni sinni. Það hefur verið ákveðið að Pjetur verði dómari fyrir Íslands hönd á HM í Hollandi og við mæðgurnar ætlum að skella okkur með. Við erum svo búin að vera skoða þann möguleika að reisa stærra reiðhús og vonandi getur sú ósk okkar ræst nú í sumar. Vorkveðja, Sigga.

Það eru ekki bara lifandi fákar á Sólvangi. Þetta er nýi mótorfákurinn hans Grétars. Ætli þetta sé alhliða gæðingur?

Elsa var seig á Lukku-Blesa í 150 m skeiðinu í meistaradeildinni 2007.

28.02 2007

Komið þið sæl á ný. Ég (Sigga) hef verið í smá vandræðum með að uppfæra heimasíðuna hérna frá Hólaskóla en nú er allt komið í lag aftur og vonandi get ég verið duglegri á næstunni. Sölusíðan hefur einnig verið í algjöru lamasessi. En þess er vert að minnast að við eigum núna fullt af góðum söluhrossum svo það er um að gera að skella sér í smá bíltúr og skoða úrvalið. Það verða vonandi teknar einhverjar myndir af gripunum í vikunni og þá get ég smellt því um leið inn á síðuna.

Annars er allt gott að frétta af okkur fjölskyldunni. Ég unni mér vel hérna fyrir norðan og er hæst ánægð með námið á reiðkennaradeildinni. Grétar er ásamt fögru föruneyti á fullu að byggja nýju reiðhöllina á Hólum og vonast er til að hún verði tilbúin seinnipartinn í mars. Hann kann einnig vel við sig hérna fyrir norðan en blótar laununum, sem er ekki skrýtið :( Á Sólvangi er svo blússandi gangur eins og venjulega, fullt hús af hrossum og Elsa, Signe (frá Danmörku) og Magga Bára (er í verknámi) þjálfa á fullu. Elsa er einnig að kenna mikið þessa stundina og er meðal annars með marga efnilega nemendur hjá nágrönnum okkar í Þorlákshöfn. Svo er hún þáttakandi í Meistaradeildinni og gaman verður að fylgjast með hvernig gömlu mun ganga í smalafiminni á morgun :) Pjetur er að sjálfsögðu enn við sama heygarðshornið, selur lyftara hjá Pon á virkum dögum og skellir sér í bóndagýrinn um helgar og lætur ekki sitt eftir liggja í sveitastörfunum. Þannig að það er nóg að gerast og vonandi bjart framundan.

11.10.2006

Það er bara allt í einu komið haust og næstum vetur, sumarið flaug hjá og orðið allt of langt síðan ég kom með fréttir af okkur fjölskyldunni hérna á Sólvangi. Ég ætla því að stikla á stóru um hvað hefur drifið á okkar daga að undanförnu og hvað við erum að fara að gera á næstu misserum.

Ég (Sigga Pje) er nú orðin fréttamaður hjá Sunnlenska fréttablaðinu ca. 2 daga í viku og ríð þess á milli út hérna á Sólvangi. Um áramótin mun ég síðan feta í fótspor mömmu og flytjast norður yfir heiðar á Hóla ásamt Grétari (kærastanum) og stunda þar nám við reiðkenn-aradeildina en hann mun fara að vinna þar. Elsa og Signe stunda tamningar og þjálfun af fullum krafti sem fyrr. Elsa er einnig að kenna mikið og fær til sín nemendur af öllum stærðum og gerðum. Pjetur er að sjálfsögðu enn við sama heygarðshornið, fer og selur lyftara á virkum dögum og skellir sér í bóndagýrinn þess á milli. Hann lenti að vísu í harðri ormalyfsviðureign við "risa stórt" folald að hans sögn og braut í sér 2 rif, þannig að hann á erfitt með að hlægja mikið þessa dagana.

Annars er bara allt gott að frétta, búið að hressa upp hesthúsið fyrir veturinn og fullt af flottum söluhrossum í þjálfun. Kíkið endilega á söluhrossin. Svo styttist óðum í sláturtíð, þannig að það verður nóg að gera á næstunni.

4.7.2006

Jæja núna erum við aftur komin heim á Sólvang eftir vel heppnað Landsmót á Vindheimamelum í Skagafirði. Við fórum með 3 hross norður, Ósk frá Forsæti í B-flokk, Þyt frá Kálfhóli í A-flokk og Spöl frá Hafsteinsstöðum í ræktunarbússýningu og afkvæmasýningu heiðursverðlaunahestsins Huga frá Hafsteinsstöðum.

Gaman er að segja frá því að Þytur og Elsa lentu í 7 sæti í A-flokknum eftir að hafa sigrað B-úrslitin og er það að okkar mati alveg frábær árangur, enda sjaldan verið eins margir glæsilegir gæðingar saman komnir í einum úrslitum.

Hafsteinsstaðir þeirra heiðurshjóna, Skapta og Hildar, var valið besta ræktunarbúið eftir æsispennandi símakosningu og gaman var fyrir Siggu og Spöl að taka þátt í slíkri glæsisýningu.

Við erum því mjög ánægð með árangur okkar á mótinu og þrátt fyrir að hentugra hefði nú verið fyrir okkur fjölskylduna að fara á Landsmót hérna á Suðurlandi, þá var þetta mjög vel heppnað Landsmót og einstaklega vel að því staðið á allan hátt.

Til hamingju Skagfirðingar með frábært mót!!!!!!

Sigga og Spölur frá Hafsteinsstöðum

Elsa og Þytur frá Kálfhóli

22/02 2006

Nú er keppnistímabilið að byrja með stæl og allt í undirbúningi fyrir næstu mót, sem ekki eru af lakari endanum. Meistaradeildin byrjar á morgun (fimmtudag) á fjórgangi og ég (Sigga) ætla að mæta með Skjóna frá Oddakoti. Síðan ætlum við Signe (danska vinnukonan) að drífa okkur á ísinn í laugardalnum um helgina. Þar mun ég einnig spreyta mig á Skjóna og Signe ætlar með Gáska frá Hveragerði. Þetta verður voða spennandi og vonandi gengur þetta allt vel :)

Signe á Gáska frá Hveragerði

29/11 2005

Það er allt á fullu í heshúsinu þessa dagana og við erum núna með 32 hesta á járnum og í fullri þjálfum. Margir nýir söluhestar eru komnir inná síðuna af öllum stærðum og gerðum og því ættu flestir að geta fundið eitthvað við sitt hæfi :)

Annars er bara allt gott að frétta úr sveitinni og ekki laust við að það sé komin smá jólastemmning á Sólvang enda allt orðið þakið í snjó á ný og öll húsin upplýst af jólaljósum.

5/9 2005

Núna er haustið að ganga í garð og við bíðum óþreyjufull eftir almennilegum þurrki til að ná síðasta heyinu fyrir útiganginn heim.

Margt spennandi er þó fram undan á Sólvangi, því eins og ég sagði frá síðast þá fórum við mæðgurnar norður á Hóla um daginn. Eftir verulega stressandi inntökupróf fengum við þær góðu fréttir að Elsa mun gerast nemandi á 3ja ári við Hólaskóla nú í vetur. Þetta verður eflaust mikil tilbreyting fyrir okkur fjölskylduna þar sem húsmóðirinn mun flytja af bæ norður í land, en tíminn verður nú fljótur að líða eins og ávallt. Ég (Sigga) mun því verða starfandi hér á Sólvangi í vetur ásamt þvi að stunda kvöldnám við Leiðsöguskóla Íslands.

Myndin hér að ofan var tekin á heimatúninu á Sólvangi í sumar. Ef vel er skoðað sést að þarna er um tvo hesta að ræða. Ég veit nú ekki hvernig á þessu stóð en kannski hefur Krummi eitthvað verið þreyttur eftir langan dag og Brynjar ákveðið að halda á honum heim:)

15/8 2005

Jæja það er nú búið að vera heillangt síðan ég uppfærði heimasíðuna enda allt búið að vera á fullu hérna á Sólvangi í sumar. Ég ætla því bara að stikla á stóru yfir atburði sumarsins.

*Ég (Sigga) byrjaði á því að útskrifast sem ferðamálafræðingur frá Háskóla Íslands í vor. Þá tók við utanskóla frumtamninga og þjálfunarpróf frá Hólaskóla. Ég tók prófin samtímis og var því með 10 prófhross vafin inn í bómul í allt sumar. Þetta gékk allt saman vel og nú á ég bara eftir að skila ritgerð til að klára dæmið.

*Tveggja vikna Barna- og unglinga-námskeið héldu okkur við efnið í byrjun sumars

* 8 folöld fæddust á Sólvangi

* 70% af heyinu er komið heim

*Fórum í 7 daga skemmtilegt hestaferðalag um Suðurland

*Og enduðum á hinu verulega blauta leðju heimsmeistarmóti í Sverige. Auðvitað er alltaf gaman á þessum mótum en ég verð nú að viðurkenna að þetta mót var fremur illa skipulagt og aðstaðan til skammar. Hestarnir og þá sérstaklega íslensku landsliðshestarnir og knapar stóðu sig þó með prýði og ég er ekki frá því að þrátt fyrir skipulagið, hafi þarna verið á ferðinni eitt sterkasta landslið okkar til þessa. Til hamingju öll :)

*Á morgun munum við mamma (Elsa) svo leggja land undir fót og ferðast norður á Hólaskóla. En þar mun hún þreyja inntökupróf í reiðkennaradeildina.

19/5 2005

Frjósemi á Sólvangi

Það er búið að vera mikið að gera á fæðingardeildinni á Sólvangi upp á síðkastið, sauðburður í fullum gangi og tvö folöld komu í heiminn í gær. Sauðburðurinn er búin að taka sinn tíma þetta árið og heimilisfólkið orðið dálítið þreytulegt, enda andvökunæturnar orðnar þó nokkrar. Þetta fylgir þó óneitanlega sveitalífinu en fallegt ungviðið kætir, hressir og bætir :)

Fylfullu hryssurnar voru sóttar ofan af mýri fyrir um 4 dögum síðan og eru nú komnar hér á bæjarhlaðið. Fyrstu folöldin létu ekki standa á sér og það er ljóst að hryssunum líður betur svona heima á hlaði, þar sem fylgst er með þeim.

Hryssan hér á myndinni heitir Iða frá Sólvangi og folaldið sem nefnt var Spænir frá Sólvangi er undan Spöl frá Hafsteinsstöðum. Þarna er Spænir litli að reyna að standa á fætur en það er svolítið erfitt að reyna að fóta sig og halda jafnvægi svona fyrstu mínúturnar.

11/4 2005

Um helgina fór fram járningarnámskeið á Sólvangi. Landsliðseinvaldurinn og járningarmeistarinn Sigurður Sæmundsson var með tveggja dag námskeið og próf fyrir þátttakendurnar sem hluta af FT prófi. Námskeiðið tókst í alla staði vel og er Siggi Sæm alger viskubrunnur. Það er alltaf svo kátt í kringum hann Sigga að helst vildum við hafa járningarnámskeið allar helgar. Nú eru flest hrossin hjá okkur orðin snilldarvel járnuð, enda stóðust allir prófið með stæl.

4/4 2005

Vorið er komið og grundirnar gróa...!

Jolly Schrenk hélt alveg frábært námskeið á Sólvangi um páskana og komust færri að en vildu. Jolly tók síðan þátt í tölti þeirra allra sterkustu í Egilshöllinni, en var svo óheppin að hryssan hennar datt í einni beygjunni og luku þær þar með keppninni, en hefðu annars eflaust komist inn í úrslitin.

Fyrstu verðlauna moldótti stóðhesturinn okkar hann Andri frá Hafsteinsstöðum hefur ákveðið að leggja land undir fót og fer til Svíþjóðar á næstu dögum. Nýjir eigendur eru fullir tilhlökkunar og fær þessi litfagri gæðingur örugglega góða notkun í Svíþjóð og kemur væntanlega fram á keppnisvöllunum í sumar.

Elsa er nú með 5 hross í sérstakri þjálfun fyrir þjálfunarpróf FT og fer í prófið þann 17.april. Gengur prógrammið vel og undravert er að sjá breytinguna sem orðin hafa á hrossunum.

kveðja PP

1/3 2005

Ég sagði hérna síðast að hún Jolly ætlaði að taka þátt á Svellköldum konum í Egilshöllinni, en ég ruglaðist á viðburðum. Hún mun að sjálfsögðu taka þátt í Landsliðsístöltinu sem er ekki síður spennandi. Skráning á námskeiðið er komin á fullt en enn eru 3 pláss laus vegna forvalla. Þeir sem hafa því áhuga á að drífa sig á fróðlegt námskeið með einum vinsælasta reiðkennara Þýskalands geta enn haft samband við Elsu í síma: 892-7159 og 554-5959 eða hjá Siggu í síma: 899-7792.

Fréttir eru þó þær að Elsa stóðst frumtamningaprófið og er nú komin á fullt í þjálfunarhrossin. Þau eru fimm talsins (Flaumur frá Laugavöllum, Klóthildur frá Glæsibæ, Stígandi frá Dalsmynni, Skörungur frá Þverá 1 og Skjóni frá Oddakoti) og velur hún 3 þeirra til að taka prófið á í lok tímabilsins. Við tókum þátt í vetrarleikum Ljúfs og Sleipnis á sunnudaginn og ég (Sigga) á Ósk frá Forsæti lentum í 5 sæti. Annars er bara ósköp lítið að frétta, mikið riðið út og lífið gengur sinn vanagang í sveitinni.

8/2 2005

Jæja nú er nú aldeilis komin tími til að uppfæra heimasíðuna. Vonandi er fólk þó ekki hætt að heimsækja okkur :)

Lífið hefur þó bara gengið sinn vanagang í sveitinni upp á síðkastið. Elsa er búin að vera á fullu við að þjálfa tryppin fyrir frumtamningaprófið og er stóri dagurinn nú seinnipart vikunnar.

Helstu fréttir eru þó þær að hin vinsæla þýska reiðkona og kennari Jolly Schrenk mun halda námskeið á Sólvangi um páskana. En eins og flestum er kunnugt hefur hún átt góðu gengi að fagna á keppnisvellinum síðastliðin ár. Hún er m.a. margfaldur þýskur meistari í hestaíþróttum á íslenskum hestum og vann marga heimsmeistaratitla á hinum þýsk-fædda Ófeigi, í tölti, fjórgangi og fimi fyrir nokkrum árum. Á síðastliðnum misserum hefur þó kveðið mest að henni á stóðhestinum Laxnesi frá Störtal. Jolly mun einnig taka þátt í Ístöltmótinu "Svellkaldar konur" sem haldið verður í Egilshöll þann 19. febrúar næstkomandi.

Skráning á námskeiðið er þegar hafin og þeir sem hafa áhuga á að taka þátt í námskeiðinu geta skráð sig hjá Elsu í síma: 892-7159 og 554-5959 eða hjá Siggu í síma: 899-7792.

9/12 2004

Nú fer að líða að jólum og væntanlega flestir komnir í jólaskapið. Sama er uppi á teningnum hérna í sveitinni og jólaundirbúningurinn á fullri ferð. Rýmingarsalan umtalaða gekk óskum framar og ekki annað hægt að segja en að fólk hafi tekið þessum nýjungum hjá okkur prýðis vel. Nokkur hross eru því nú á leið í sínu nýju heimkynni, nær og fjær, þannig að eflaust verður þetta endurtekið næst þegar færi gefst til. Annars er bara verið að þjálfa á fullu hérna á Sólvangi og Elsa vinnur hörðum höndum við að temja tryppin fyrir frumtamningaprófið. En talandi um hátíðirnar og allt umstangið þar um kring, þá kannast eflaust margir við vandræðin við að finna réttu jólagjafirnar. Því datt mér í hug að benda ykkur á reiðtygin frá Alla Aðalsteins og Unn Kroghen. Þessi reiðtygi eru hönnuð af þeim með það í huga að þau fari hestinum sem best og að gæðin séu í fyrirrúmi. Reiðtygin eru því ákaflega vel heppnuð, enda engir viðvaningar þarna á ferð, þar sem þau hafa bæði áralanga reynslu og glæstan feril að baki í hestamennskunni. Enginn hestamaður ætti því að verða svikinn af því að fá til dæmis hófhlífar í jólapakkann sinn. Þið getið fengið frekari upplýsingar um reiðtygin á heimasíðunni þeirra http://www.alliunn.se/ eða kíkt til dæmis í Mr-búðina eða Baldvin og Þorvald á Selfossi. Ef þið lendið svo í vandræðum með að finna fínan hest til að bera þessi reiðtygi þá skal ég fúslega aðstoða ykkur við að finna hann :)

Jólakveðjur frá Sólvangi

Við Þytur vorum voða fín á skeiðinu í sumar :)

11/11 2004

Í byrjun mánaðarins var tilkynnt um úrslit skoðanakannanar á hestar.net en samkvæmt henni fékk ég betur nefnd Sigríður Pjetursdóttir flest atkvæði sem Gæðingaknapi ársins. Ég veit ekki betur en að kosið hafi verið eftir siðarinnar reglum og vil ég því þakka velunnurum mínum stuðninginn.

8/11 2004

Flestir hafa eflaust orðið varir við umræðu sem myndast hefur undanfarna daga um réttmæti auglýsingar þar sem að stúlka í reiðbuxunum einum saman situr fyrir. Í kjölfarið var rætt um myndina af Andra frá Hafsteinsstöðum sem setin er af vinkonu minni henni Möndu. Nokkuð ljóst er að fólk hefur misjafnar skoðanir hvað þetta varðar og allt gott og blessað með það. Mér datt bara í hug að sýna hérna hreyfimynd sem ég fann á netinu um daginn þar sem að henni svipar verulega til myndarinnar af Andra og Möndu. Það má spyrja sig að því hvort að myndin hafi vakið það mikla athygli að höfundur þessarar myndar sem er af erlendu bergi brotinn hafi ákveðið að hafa þennan íslenska hest og stúlku sem fyrirmynd. Og ef svo væri þá er ég mjög sátt við auglýsingagildi myndarinnar :)

Valsi frá Flugumýri

Ísar frá Vorsabæ 1

19/9 2004

Nú er haustið gengið í garð og margir búnir að sleppa í haustbeitina. Hér á Sólvangi eru aftur á móti mikið af söluhrossum og tamningartryppum á járnum, því ekki þýðir að loka búðinni þó að laufin fölni. Oft eru haustin líka tilvalinn til að vinna í hrossunum sem að ekki hefur verið sinnt að fullu yfir hásumartímann vegna stanslausra hestamannamóta og sýninga.

Ertu ef til vill að leita að keppnishesti fyrir næsta ár, litfögrum stóðhesti eða drauma reiðhestinum? Kannski er hann að finna hér :) Skoðaðu listann með söluhrossum hér til hliðar og eflaust er þar eitthvað við þitt hæfi.

Ný hross á sölulista eru t.d. Valsi frá Flugumýri og Ísar frá Vorsabæ 1 mjög efnilegir ungir klárhestar, sem eiga eflaust eftir að gera góða hluti á keppnisvellinum í framtíðinni.

10/9 2004

Ferðaþjónusta er sú starfsgrein sem er í hvað mestum vexti í heiminum í dag og er hestatengd ferðaþjónusta eitt af aðal aðdráttaröflum landsins. Mikilvægt er því að standa vel að skipulagi og stefnumótun í hestatengdri ferðaþjónustu. Ég er við nám í Ferðamálafræðum við Háskóla Íslands og hef reynt að skrifa um hestamenn og hestatengda ferðaþjónustu þegar tækifæri hefur gefist. Eflaust hafa einhverjir gaman að því að lesa fróðleiksmola tengda íslenska hestinum og hef ég því ákveðið að birta hér eina ritgerð sem fjallar um ferðaþjónustu, menningu , íslenska hestinn og hugmynd að fyrirtæki í hestatengdri ferðaþjónustu, þ.e. Hestamiðstöðina Sólvang og einnig skýrslu sem fjallar um hestamennsku í þéttbýli, viðhorf og sjálfsímynd hestafólks. Ég vona að þessi verkefni séu skemmtileg og fróðleg aflestrar og gaman væri að heyra athugsemdir eða gagnrýnisraddir frá þeim sem að leggja í lesturinn. Varla þarf að minnast á það að eftirprentun eða notkun efnisins á einn eða annan hátt er ekki leyfileg án þess að hafa samband við höfund. Verkefnin eru hér á hægri hönd :)

Hestamiðstöðin Sólvangur

Hestamennska í þéttbýli,
viðhorf og sjálfsímynd hestafólks

8/9 2004

Við fjölskyldan erum komin aftur á Sólvang eftir fjögurra daga hestaferð um Löngufjörur á Snæfellsnesi. Við slóumst í hóp með Sigga á Stóra-Kálfalæk og fríðu föruneyti hans alls staðar að úr heiminum. Siggi er enginn nýgræðingur í hestaferðum á þessum slóðum og fengum við því að kynnast fjörunum með frábærri leiðsögn hans. Ferðin var því vel heppnuð í alla staði, veðrið var gott og ekki spillti frábær félagsskapur og góður hestakostur. Myndir úr ferðinni eru hér vinstra megin á síðunni undir tenglinum MYNDIR.

23/8 2004

Suðurlandsmót var haldið á Gaddstaðaflötum um helgina og varð Sigga Suðurlandsmeistari í Meistaraflokki Fimmgangi á gæðingnum Þyt frá Kálfhóli. Þau hlutu einkunnina 7,23 í forkeppni og 7,67 í úrslitum.

23/8 2004

Klárhryssan Ósk frá Forsæti sem að er í eigu okkar fjölskyldunnar var sýnd í kynbótadómi á Síðsumarssýningu á Gaddstaðaflötum nú í vikunni og hlaut hún fyrir byggingu 7,94, fyrir hæfileika 7,98 og í aðaleinkunn 7,96. Ósk hækkaði verulega í hæfileikaeinkunn frá því í fyrrasumar og fékk hún nú:

Tölt: 8,5 - Taktgott Há fótlyfta
Brokk: 8,5 - Skrefmikið Svifmikið
Skeið: 5,0
Stökk: 8,5 - Ferðmikið Teygjugott
Vilji og geðslag: 8,5 - Vakandi
Fegurð í reið: 8,5 - Mikil reising Mikill fótaburður
Fet: 8,5 - Taktgott Rösklegt
Hægt tölt: 8,0
Hægt stökk: 8,0

Sýnandi hryssunar að þessu sinni er Daníel Jónsson og mun hann einnig sýna hana í yfirlitssýningunni næstkomandi miðvikudag.

29/7 2004

Fjöldi nýrra söluhrossa eru nú komin inn á síðuna undir linknum SÖLUHROSS hér til hliðar. Þar má meðal annars nefna glæsihryssurnar Sprettu frá Bakkakoti og Hrund frá Litla-Hvammi 1, en einnig er þar að finna fjölskylduhross sem og Þráð frá Eyrarbakka, Dögg frá Kópavogi og fleiri.

Hrund frá Litla-Hvammi 1

9/7 2004

Nú er Landsmóti lokið og heyskapur kominn á fullt. Það gekk heldur betur vel á Landsmótinu og endaði Þytur í öðru sæti í A-flokki gæðinga og Sigga fékk knapastyttuna fínu afhenta.

23/6 2004

Gisting yfir Landsmót!

Þar sem að forföll voru boðuð á síðustu stundu eru þessi tvö hús staðsett á Sólvangi við Eyrarbakka, laus til leigu yfir landmót. Húsin eru fullbúin öllum þægindum og eru nánari upplýsingar um húsin hér við hliðina undir GISTING.

Sólvangur er einungis í 40 km fjarlægð frá Landsmótssvæðinu þannig að stutt er að fara.

Ef áhugi er fyrir hendi vinsamlegast hafið samband við Siggu Pje í síma 899-7792

23/6 2004

Hrúturinn

Eftir að við fluttum á Sólvang hófum við strax handan við kynbætur á kindunum sem fyrir voru. Einn nágranninn sagðist eiga forláta hrút, algeran kynbótagrip og gætum við keypt hann fyrir aðeins 20 þúsund krónur og gerðum við það að sjálfsögðu og staðgreiddum hann. Nágranninn lofaði að koma með hrútinn daginn eftir. Daginn eftir kom granninn í heimsókn, en með engan hrút.“Heldurðu að greyið hafi ekki drepist í nótt” sagði granninn. Við vorum nú ekkert að ergja okkur yfir því og báðum nágrannan bara að borga okkur skepnuna til baka. En, nú kom babb í bátinn því nágranninn hafði eytt öllum peningunum og gat ekki borgað til baka. Við sögðum honum þá samt sem áður að koma með dauðan hrútinn. “Dauða, hrútinn!, hvað ætlið þið eiginlega að gera við hann?” Nú, við sögðumst ætla að setja hann á tombólu og upplagt væri að hafa hrútinn í verðlaun.”Þið getið ekki haft dauðan hrút í vinning” Jú, það töldum við vera ekkert mál, því það þyrfti enginn að vita að hann væri dauður. Mánuði seinna hittum við grannan og spurði hann hverning hlutaveltan hefði gengið. “Hún gekk vonum framar, við seldum 500 miða á þúsund krónur stykkið og fengum því hálfa milljón í vasann. “Nú” hváði granninn, “kvartaði enginn yfir vinningnum?” “Bara sá sem vann” svöruðum við, “þannig að við endurgreiddum honum bara þúsundkallinn”.

18/6 2004

Landsmót er framundan og er nú endanlegur keppendalisti að komast á hreint.

Ljóst er að fjögur hross í eigu fjölskyldunnar verði í hópi þeirra gæðinga sem að munu blanda sér í baráttuna á Hellu dagana 28. júní - 4. júlí. Spölur frá Hafsteinsstöðum og Elsa munu keppa í B-flokknum fyrir Hestamannafélagið Sörla í Hafnarfirði, en hann hlaut einkunnina 8,47 í forkeppni. Einnig mun hún verða í hópi þeirra 30 knapa sem að keppa í töltinu með glæsitöltarann Dofra frá Þverá, en þau koma inn með einkunnina 6,87.

Þytur frá Kálfhóli II og Sigga Pje munu koma sterk inn í A-flokknum en hann hlaut einkunnina 8.65 í forkeppni og keppir fyrir Hestamannafélagið Sleipni.

Síðast en ekki síst mun Selma Friðriksdóttir tamningastúlka á Sólvangi ríða Ósk frá Forsæti í unglingaflokknum en hún keppir einnig fyrir Sleipni.

Andri frá Hafsteinsstöðum

7/6 2004

Stóðhestarnir Andri og Spölur frá Hafsteinsstöðum eru komnir í hólf fyrir sumarið. Þeir sem að hafa pantað undir stóðhestana eru því vinsamlegast beðnir um að hafa samband sem fyrst.

Spölur er kominn inn á Landsmót í B-flokkinn og mun keppa fyrir Hestamannafélagið Sörla í Hafnarfirði. Hann hlaut einkunnina 8,47 í forkeppni.

20/5 2004

Fyrsta folald sumarsins á Sólvangi fæddist í fyrradag . En það var bleikálótt merfolald undan Flugu frá Breiðabólstað og Keili frá Miðsitju. Hún hefur hlotið nafnið Fljóð frá Sólvangi.

Við bíðum svo spennt eftir hinum 8 átta folöldunum sem vonandi koma í heiminn von bráðar.

Þær eru nokkuð samstíga mæðgurnar :)

20/5 2004

Það verður nokkuð erfitt að fara hulduhöfði í framtíðinni með hestakerruna okkar aftan í, þar sem að búið er að merkja hana í bak og fyrir. Fjölskyldan er nokkuð ánægð með útkomuna þannig að látið ykkur ekki bregða ef við verðum mikið á rúntinum næstu daga :)

22/04 2004

Nú um helgina verður haldin sýning hinnar íslensku Landnámshænu í Húsdýragarðinum og að sjálfsögðu munu tveir fulltrúar frá Sólvangi verða á staðnum. En það eru þeir Grámann (sjá mynd) og Milli sem gerðist svo frægur að um hann var fjallað í fréttum Ríkissjónvarpsins í gærkvöldi.

Já hverjum þykir sinn fugl fagur... :)

12/04 2004

Nú er afstaðið námskeiðið með Karly Zingsheim, en því lauk nú á föstudaginn eftir þriggja daga kennslu. Námskeiðið var mjög vel heppnað og sýndi Karly fram á það enn á ný hversu frábær kennari hann er. Rúna stóð við hlið hans á meðan námskeiðinu stóð og hjálpaði til við að útskýra fyrir nemendunum hvað þeir ættu að gera. Þau hjónin voru því samstíga í kennslunni sem að gerði það að verkum að nemendur fengu 2 kennara í stað eins. Nemendur námskeiðsins héldu sælir heim eftir kennsluna og minntust margir á það að einhver hugarfarsbreyting á reiðmennsku fylgdi í kjölfarið.

Á laugardagskvöldinu tók Karly síðan þátt í Stórsýningu Landsliðsins í Egilshöllinni á Sæla frá Holtsmúla og enduðu þeir í þriðja sæti í Stóðhestakeppninni.

Myndir af námskeiðinu og æfingum á svellinu er komnar inn!

06/04 2004

Á morgun byrjar hér á Sólvangi þriggja daga námskeið með Karly Zingsheim og Rúnu Einarsdóttir. Námskeiðið mun standa yfir í 3 daga og eru 12 knapar víða af landinu skráðir til leiks. Eins og eflaust margir vita þá var samskonar námskeið haldið hér árið 2002 við miklar og góðar undirtektir, þannig að eftirvæntingin eftir þessu námskeiði leynir sér ekki.

Karly og Rúna munu síðan að námskeiði loknu taka þátt í Stórsýningu Íslenska Landsliðsins í Egilhöllinni á Laugardagskvöldinu, sem að eflaust verður afar spennandi.

Hér eru myndir af námskeiðinu :)

23/03 2004

Nú um helgina var haldið á Hestheimum námskeið með hinum alkunna knapa og reiðkennara Johan Häggberg. Johan kemur frá Svíþjóð og er eflaust þekktastur fyrir afrek sín á stóðhestinum Aski frá Håkansgågarden, en þeir eru m.a. núverandi heimsmeistarar í gæðingaskeiði. Á námskeiðinu leiddu saman hesta sína 9 kunnir knapar víða af landinu og byrjaði námskeiðið á föstudegi í bóklegum tíma. Síðan voru nemendur í einkatímum fram á sunnudag. Nemendurnir fylgdust spenntir með hverjum öðrum og mynduðust oft miklar og góðar umræður innan hópsins í kjölfarið. Johan stóð sannarlega undir væntingum sem kennari og hafa nemendur námskeiðsins úr miklu að moða á næstu misserum. Aðstaðan í Hestheimum er eins og best verður á kosið og staðarhaldarar tóku vel á móti hópnum.. Það má því með sanni segja að námskeiðið hafi verið vel heppnað í alla staði.

8/03 2004

Það eru búnar að vera töluverðar umræður um litfagra stóðhesta undanfarið á netinu og hafa þar m.a. okkar stóðhestar verið nefndir í því sambandi. En þá er ég náttúrulega að tala um þá Spöl og Andra frá Hafsteinsstöðum. Sjá STÓÐHESTAR hér til hliðar. Umræðan hefur að mestu snúist um það hversu fáir moldóttir og vindóttir hátt dæmdir stóðhestar séu til á landinu og að það þyrfti að sporna við því að slíkir gripir séu seldir úr landi. Einnig hefur í umræðum verið vegið að litnum á Spöl og komst ég ekki hjá því að svara þeim kolröngu ummælum að hesturinn væri bara rauðblesóttur.

Ég fékk nokkuð skjót viðbrögð við svari mínu frá slúðrurum og enn vilja einhverjir meina að Spölur beri ekki þann lit sem að hann í raun ber. En sitt sýnist hverjum og kannski væri bara réttast að láta þessi ummæli sem "VIND" um eyru þjóta :)

Kveðja Sigga

Hér er að gamni mynd af Spöl og Dofra sem að tekin var um helgina. Dofri er án efa rauðblesóttur þannig að Spölur hlýtur að vera sjúddirarí rei.....

13/02 2004

Jæja nú er ég loksins búin að koma inn myndunum úr afmælinu :) Tæknin er nefnilega búin að vera að stríða mér eitthvað undanfarna daga. En nú má jafnvel búast við nýjum myndum oftar inná síðuna þar sem að bóndinn á bænum fékk þessa flottu digital myndavél í afmælisgjöf. Ætlunin er að reyna að taka myndir af keppnum og öðrum atburðum í hestamennskunni og búa til myndarlegan myndabanka.

08/02 2004

Í gærkvöldi var haldin vel heppnuð veisla í tilefni af fimmtugsafmæli Pjeturs N Pje. Veislan var haldin í félagsheimilinu Stað á Eyrarbakka og voru um 120 manns mættir til að fagna með okkur fjölskyldunni á þessum tímamótum. Boðið var upp á heimatilbúnar veitingar úr afurðum frá Sólvangi og köku í eftirrétt. Mikið var um skemmtilegar uppákomur um kvöldið og má m.a. annars nefna að Karlakór Selfoss mætti á svæðið og söng nokkur lög við góðar undirtektir. Eftir matinn steig á stokk hin frábæra stuðhljómsveit karlakórsins Stefnis en þeir félagar (10 talsins) héldu síðan uppi stuði fram eftir nóttu.

Hér eru myndir úr afmælinu :)

16/01 2004

Það er aldeilis snjórinn og kuldinn sem að herjar á okkur Íslendinga þessa dagana og ekki annað hægt en að vorkenna aumingjans útigangshrossunum sem að standa af sér þessi vonskuveður. Ég velti oft fyrir mér hversu harðger íslenski hesturinn okkar er og dáist af honum fyrir vikið.

Sum hross eru þó á húsi yfir veturinn og eru nú 32 hross á húsi á Sólvangi, ásamt 9 folöldum sem að eru ræktuð af okkur fjölskyldunni. Flest þeirra eru undan Andra og Spöl frá Hafsteinsstöðum, en einnig eru þar hestfolöld undan Suðra frá Holtsmúla og Pilti frá Sperðli. Gaman er að fylgjast með ungviðinu vaxa úr grasi og erum við fjölskyldan mjög ánægð með útkomuna, þar sem að flest folöldin sýna strax mikla takta. Til dæmis má nefna Spólu sem að er undan Spöl og Steinvöru frá Nautabúi sem er fyrstu verðlauna Orra-dóttir, en hún er feykirúm á öllum gangi og virðist ætla að verða dálítið lík mömmu sinni. Svo má nefna stóðhestsefnin okkar 2 en það er hann Meitill undan Pilti og Flugu frá Breiðabólstað sem að er margverðlaunuð klár- og tölthryssa og Mósart sem er undan Suðra og Tíbrá frá Ytri-Varðgjá. Þeir eru báðir vígalegir á brokki, mjög rúmir og gaman er að sjá hversu mikið tölt virðist vera í Suðra-syninum.

Meitill og Mósart

Spá og Máni

30/12 2003

Nú er svo komið að þetta ágæta ár 2003 er að líða og árið 2004 er að ganga í garð.

Margt skemmtilegt hefur verið um að vera á Sólvangi síðastliðið ár og má þar m.a. nefna námskeið með Walter Feldmann sem að vakti mikla lukku meðal nemenda námskeiðsins, en einnig voru haldin námskeið fyrir ungu kynslóðina yfir sumartímann. Það má með sanni segja að það sé skemmtilegt og verðugt verkefni að fá að fylgjast með og leiðbeina framtíðarknöpunum í leik og starfi og mun að sjálfsögðu vera boðið upp á nokkur slík námskeið næsta sumar. Ætlunin var að halda mót hér í sumar, en þar sem að mikið var um annir, varð því miður ekkert úr því. Stefnan er því tekin á að halda hér einhver mót á árinu 2004 og vonandi bara fljótlega.

Annars stendur heimsmeistaramótið í Danmörku algjörlega upp úr á síðastliðnu ári og verður það lengi í minnum haft. Það er alltaf jafn gaman að verða vitni að þeim gífurlegu afrekum sem að knapar landsins og þessir ótrúlegu gæðingar gera og fá að taka þátt í þeirri gleði og þeim fögnuði sem að brýst út meðal áhorfenda.

Það verður einnig margt um að vera á Sólvangi á komandi ári. Þá má helst nefna námskeiðið með Karly Zingsheim sem verður haldið um páskana, en gífurleg eftirspurn hefur verið eftir því að komast á það, enda Karly sýnt það og sannað að hann er einn af okkar fremstu reiðkennurum.

Einnig verður eitthvað um breytingar þar sem að Snorri Valsson sem að hefur verið aðalvinnumaðurinn okkar mun nú hætta störfum á Sólvangi og hefur þess í stað ákveðið að drífa sig í skóla. Í stað hans hefur því verið ráðin ung stúlka frá Danmörku sem að heitir Anne.

Markmið okkar á árinu 2004 er svo að vera vel ríðandi á Landsmótsári og njóta stundanna í sveitinni á Sólvangi.

Að lokum viljum við óska öllum gleðilegra jóla og farsældar á komandi ári.

Fjölskyldan Sólvangi.

14/12 2003

Það er eitthvað búið að vera lítið um fréttir og uppfærslu á heimasíðunni undanfarið þar sem að ég er á fullu í prófum. Setti þó inn nokkra nýja brandara fyrir þá sem hafa gaman að því. Annars er bara allt við það sama á Sólvangi, mikið riðið út og fullt af efnilegum hrossum. Það er gaman að segja frá því að fyrstu 2 tryppin sem að eru ræktuð af okkur fjölskyldunni eru að stíga sín fyrstu skref í tamningu. Það er framtíðar stóðhestsefnið hann Riddari, undan Hróki frá Hlemmiskeiði og Vöku frá Víðivöllum og Þruma Reyksdóttir undan Flugu frá Breiðabólstað. Þau eru bæði orðin vel reiðfær og lofa mjög góðu. Það verður því spennandi að fylgjast með þeim í framtíðinni.

Það eru miklar kynbætur í gangi hjá okkur í kindaræktinni þessa daganna og búið er að sæða allar kindurnar. Miklar vangaveltur voru um hvaða hrútar væru gæfulegastir og var á endanum fengið sæði úr Arfa, Sólon og Snodda sem að eru allt mjög hátt dæmdir hrútar.

Annars vona ég bara að jólaundirbúningurinn gangi sem best hjá ykkur öllum og þið sem að eruð í prófum eins og ég ,,Hættið að lesa þetta og byrjið að læra"! Jólakveðjur frá Sólvangi

Sigga Pje

20/11 2003

Höfðinginn Skagfjörð frá Þverá, var felldur í dag, fyrir sakir skaufakrabbameins sem ekki varð við ráðið. Skagfjörð var orðinn 26 vetra gamall en á þessum árum hafði hann afrekað að vinna yfir 300 verðlaun. Skagfjörð var einstakur gæðingur sem átti sér engan líkann. Það má með sanni segja að hans verður sárt saknað en minning hans mun lifa.

Nú Skagfjörð er fallinn frá
og finnur hvíld í beði.
Minnumst öll með eftirsjá,
öðling sem veitti oss gleði.

12/11 2003

Það eru komin nokkur ný hross inn á SÖLUHROSS hér vinstra megin á síðuna. Þar má meðal annars nefna Óðinn tveggja mánaða taminn, efnilegan fimmgangshest sem að myndin er af.

9/11 2003

Það hafa streymt til mín skemmtilegir brandarar síðustu daga og eru nokkrir þeirra komnir inn í brandarabankann hér vinstra megin á síðuna. Ég vil þakka öllum þeim sem að sendu mér línu og vona að sem flestir hafi gaman af þessu.

3/11 2003

Það geta ekki öll dýrin í skóginum verið vinir. Úbbs!

21/10 2003

Fyrst að ég var að gera grín að honum Grána gamla um daginn datt mér í hug að sýna ykkur hana Matthildi Búkollu sem að hefur valið sér sama ferðamátann :)

6/10 2003

Jæja nú er sláturtíðin gengin í garð og var fyrsti í slöktun í dag. Það er nú oft erfitt að sjá á eftir þessum greyjum, en svona er nú bara lífið.

6/10 2003

Oft ratast kjöftugum orð í munn því að Snorri segir gjarnan ,,Fé er jafnan fóstra líkt"

Látum okkur sjá :)

Það stefnir allt í það að Karly Zingsheim og Rúna Einarsdóttir muni halda sitt annað reiðnámskeið á Sólvangi um páskana 2004.

Námskeiðið mun verða ætlað keppnisfólki til undirbúnings fyrir stórátök sumarsins en fjöldi þátttakenda verður takmarkaður til að sem bestur árangur náist.

Karly er tvímælalaust einn færasti þjálfari og knapi á íslenskum hestum um þessar mundir. En yfirburðir hans liggja ekki síst í hvernig honum tekst að blanda saman af frábærri kunnáttu klassískum fimiæfingum og frjálsri reiðmennsku þar sem lagt er upp úr drift á gangtegundum.

Rúnu þekkjum við nú öll sem frábæran og prúðan knapa, sem hefur mikla reynslu af tamningum og þjálfun hrossa ásamt því að eiga glæsilegan keppnisferil að baki.

Námskeiðið verður auglýst síðar!

18/9 2003

Það er búin að vera mikil sorg á Sólvangi á síðastliðnum dögum, því að tvö af dýrunum okkar þurftu að kveðja og fara til dýrahimna. En það var heimilishundurinn hún Loppa sem var orðin svo gömul og efnilegi graðfolinn okkar hann Háfeti undan Flugu og Kveik, sem sló svo eftirminnilega í gegn á folaldasýningu á Ingólfshvoli fyrir 2 árum. Hann slasaðist í stóðhestagirðingu og því miður var ekkert hægt að gera.

15/9 2003

Skagfjörð frá Þverá, gamli gæðingurinn okkar, var heima við í sumar og fékk að fara nokkrar ferðir með krakkana á reiðnámskeiðinu. Honum hefur ekki verið riðið í 6 ár og gaman var að sjá hversu sprækur þessi 26 vetra höfðingi er enn.

9/8 2003

Eftir frábærar stundir á Heimsmeistarmótinu í Herning eru allir fjölskyldumeðlimir Sólvangs komnir heim aftur. Við óskum keppendum mótsins og öllum sem að stóðu innilega til hamingju með frábæran árangur! :)

6/6 2003

Nú er hann Andri okkar frá Hafsteinsstöðum kominn í fyrstu verðlaun. Sjá dóminn undir stóðhestar hér við hliðina.

21/5 2003

Walter Feldmann námskeiðið sem haldið var þann 27-29 apríl, fór vel fram í alla staði og voru þátttakendur ánægðir með útkomuna. Hann kenndi meðal annars hvernig hægt er að þjálfa innbundin hest í taumi eins og myndin hér sýnir.

15/4

Fákskrakkar komu í heimsókn

Fákskrakkar komu við á Sólvangi í hinni árlegu vorferð félagsins. Allir fengu prins póló og kók og skoðuðu dýrin á bænum við góðar undirtektir.

Takk fyrir komuna! :)

11/4 2003

Þröngt mega sáttir sitja

Gráni var bara sáttur á leið sinni á sína fyrstu keppni, þar sem að hann tók þátt í valhoppi og vann :)

9/4 2003

Reiðnámskeið á Sólvangi

Haldin verða fjögur námskeið fyrir börn og unglinga í sumar.

9-13 Júní - Byrjendanámskeið

16-20 Júní - Framhaldsnámskeið

30 Júní -4 Júlí - Byrjendanámskeið

7-11 Júlí - Framhaldsnámskeið

Skráning er hafin í síma 892-7159 eða 554-5959, hjá Elsu

25/2 2003

Walter Feldmann á Sólvangi
Reiðsnillingurinn og Íslandsvinurinn Walter Feldmann kemur til Íslands og heldur þriggja daga reiðnámskeið á Sólvangi við Eyrarbakka 27-29 apríl nk. Takmarkaður fjöldi þátttakenda. Námskeiðið kostar 25.000 kr. á mann. Áhugasamir hafi samband við Elsu í símum 5545959-8927159 eða sendið tölvupóst elsa-m@islandia.is

Reiðvöllur og skeiðbraut.

Seinnipartinn í gær fórum við fyrstu ferðina á nýja vellinum okkar. Eftir að hafa verið að týna grjót af honum í nokkra daga var alveg frábært að geta riðið spariskjónunum okkar á ný völtuðum vellinum. Völlurinn verður að vísu vígður við betra tækifæri og vonandi verða ófá mótin þreytt á honum.